Einföld hráfæðis uppskrift sem hægt er að galdra úr konfekt, hollar nammistangir og ljúffenga hráfæðisköku!

Þetta er virkilega gott konfekt og auðvelt í framkvæmd. Konfektið geymist í viku í kæli en ég geymi það alltaf í frystinum. Það er hægt að borða það beint úr frystinum en það er samt betra ef þú leyfir því standa í 10 - 15 mín. Ég geri venjulega tvöfalda uppskrift, bý til konfekt og heilsustangir úr helmingnum (eða eins mikið og ég nenni) og skelli afgangnum í kökubotn. Gæti ekki verið einfaldara og þægilegra.

Innihald:

• 60 g kókosolía
• 1 banani (vel þroskaður)
• 1 dl haframjöl
• 1 dl kókosmjöl
• ¼ dl lífænt kakó
• 250 gr döðlur
• 1 ½ tsk vanilludropar
• 1 ½ tsk kanil
• Kókosmjöl eða möndlur til að velta konfektinu upp úr.

Aðferð:

1. Láttu döðlurnar liggja í bleyti í u.þ.b. klukkutíma.
2. Kókosolíudollan látin liggja í heitu vatnsbaði þannig að hún mýkjist.
3. Skelltu öllum hráefnunum í matvinnsluvélina og hún sér um restina, nema ef þú átt ekki svoleiðis græju (eða töfraskera) þá skerðu döðlurnar smátt, stappar bananann og blandar hinum hráefnunum við. Aðeins tímafrekara en samt mjög auðvelt.
4. Smakkaðu deigið til og gerðu það að þínu eigin með því að bæta við meiri kanil, kókosmjöli , hálfum banana í viðbót, stevia eða einhverju öðru sniðugu.

Konfekt:

1. Mótaðu litlar kúlur og veltu þeim upp úr einhverju girnilegu eins og kókosmjöli, ristuðu kókosmjöli eða möndlum.
2. Sett í kæli í ca. 30 mín og svo skellt í poka eða box og í frystinn. 

Hollar nammistangir:

Mér finnst mjög gott að eiga hollar nammistangir handa stelpunum mínum og set ég þá deigið í svart klakabox frá IKEA og frysti þær svo. Gerist ekki auðveldara 

http://www.ikea.is/products/12

Hráfæðiskaka

Þessi er í miklu uppáhaldi hjá mér og ég geri hana fyrir öll afmæli og veislur. Syndsamlega góð kaka fyrir sykursjúka og þá sem sneiða hjá sykri og já, náttúrulega alla hina.

Smjörpappír er skellt í kökuform, deiginu þrýst vel í formið og þetta set ég inn í kæli ef ég ætla að bera kökuna fram bráðum, annars inn í frysti. Þegar deigið er frosið þá tek ég kökubotninn úr kökuforminu og set álpappír utan um smjörpappírinn og skelli því aftur í frystinn. Þá er svo yndislega einfalt að galdra fram köku næst þegar von er á gestum. 

Tekur botninn úr frystinum, þeytir rjóma og stappar banana, blandar banananum við rjómann og setur ofan á botninn. Skerð niður ávexti og skellir þeim ofan á kökuna.

Súkkulaðibitakökur

Þessar eru gerðar fyrir hver jól á mínu heimili. Auk þess að vera ljómandi góðar þá finnst litlum fingrum mjög gaman að búa þær til, og ekki þarf að hafa neinar áhyggjur þótt ákafir hjálparsveinar seti óvart of mikið af kókosmjöli eða einhverju öðru. Þetta er svona uppskrift sem er ekki hægt að klúðra. Litla systir mín ELSKAR deigið og höfum við oft búið til svona deig fyrir jólin en endað með fáar.. eða jafnvel engar kökur, hehe.

250 g smjör (við stofuhita)

5 dl púðursykur

2 egg

1 tsk vanilludropar

2 1/2 dl kókosmjöl

5 dl haframjöl

5 dl hveiti

2 tsk lyftiduft

1/2 tsk matarsódi

1 msk vatn

200 g suðusúkkulati (brytjað niður)

Smjör, púðursykur og egg hrært saman þangað til það verður létt og ljóst og þá er hinum hráefnunum bætt við, endað á súkkulaðinu. Búðu til litlar kúlur, skelltu þeim á ofnplötu með smjörpappír á, þrýstu svo fingrunum ofan á til að fletja þær aðeins út.

Bakað við 200°C í ca. 8 mín eða þangað til þær verða fallega ljósbrúnar.

Black eyed peas súpa

Hérna er ein gömul og góð sem ég bjó mjög oft til á þeim 2 árum sem ég var vegan og var líka ósjaldan í matinn hjá mér þegar ég var grænmetisæta. Þá bjó ég til 2 - 3 falda uppskrift og frysti afganginn. Það er reyndar langt síðan þessi rataði á matseðil vikunnar þótt hún sé ódýr og að mínu mati ljómandi góð, því hún fellur alls ekki í kramið hjá hinum fjölskyldumeðlimunum. En ég ákvað að skella henni hérna inn í von  um að það sé e-r vegan/ vegetarian sem kann að meta hana :)

Innihald:

• 250 g black eye beans (augnbaunir)
• 1 tsk olívuolía
• 1 stór laukur (smátt saxaður)
• 2 hvítlauksrif
• 2 gulrætur
• 2 sellerí
• 1 rauð paprika
• 1/2 tsk timian
• 1 lárviðarlauf
• 1,2 L grænmetissoð
• 600 ml vatn
• salt og pipar 
• steinselja til skrauts (má sleppa)

Aðferð:

1. Baunir látnar liggja í bleyti í a.m.k. 6 klst. 
2. Síðan eru baunirnar settar í pott og vatn sett í pottinn þangað til vatnið nær a.m.k. 5 cm hærra en baunirnar.
3. Þetta er látið sjóða í 10 mín. 
4. Helltu baununum í sigti, skolaðu þær með köldu vatni og láttu mesta vatnið renna af.
5. Laukur steiktur í 3-4 mín (hræra oft). Hvítlauk, gulrætum, sellerí og papriku bætt við og steikt í 2 mín.
6. Bættu við baunum, timian, lárviðarlaufi, soði og vatni. Látið ná suðu, hiti minnkaður og látið malla í ca. klukkustund. Hrært í af og til.
7. Hrísgrjónunum bætt við. Súpan söltuð og pipruð. Látið malla í ca. 30 mín, eða þangað til baunir og hrísgrjón eru orðin mjúk.
8. Lárviðarlaufið tekið úr. Súpan smökkuð til og krydduð og hafðu það í huga að less is more gildir ekki um svarta piparinn.

Meðlæti:
Það er gott að hafa gróft og gott brauð með en alls ekkert nauðsynlegt.

Bruschetta

Bruschetta er mjög góður forréttur og þetta er líka ein af all time uppáhalds pizzunum mínum.

Innihald:

• 10 stk vel þroskaðir tómatar
• 3 hvítlauksrif
• 3 msk olífuolía
• oregano 
• svartur pipar
• snittubrauð eða pizzudeig

Aðferð:

1. Fræhreinsar tómatana og skerð þá í litla bita.
2. saxar hvítlaukinn smátt
3. blandar öllu saman í skál
4. Best er ef þú leyfir þessu að marenírast í 1-2 tíma. Þá kemur svo mikið hvítlauksbragð af tómötunum og olífuolíunni. En það er samt allt í lagi að nota þetta stuttu eftir að þetta er gert.
5. Svo skellirðu blöndunni á snittubrauð eða pizzudeig og bætir smá svörtum pipar ofaná.
6. Hitað í ofni við 180°C  í 3 - 5 mín. 
7. Njótið vel

Pizza

Pizzubakstur er orðin listgrein á mínu heimili og eftir að hafa búið til pizzur um það bil vikulega síðustu árin þá eru komnar miklar seramóníur um hvernig á að gera þetta. Það er svo kósý á föstudags eða laugardagskvöldi að búa til gómsætar pizzur og góðan eftirrétt. Ef ég bý deigið til í brauðvélinni þá bý ég bara til hálfa uppskrift og stilli vélina á "dough". Hálf uppskrift er fín fyrir þunnar pizzur fyrir 5-6 en oftast bý ég til heila uppskrift og bý til kanelsnúða, skinkuhorn, pizzusnúða eða fyllt brauð úr afgangnum.
Mér finnst gaman að búa til margar ólíkar pizzur og allir fá sér eins og þeir vilja en ef að við búum bara til eina pizzu á mann þá sker ég oftast út hjartapizzur handa stelpunum. Einnig er hægt að nota pizzuhnífinn til að skera út brauðstangir úr pizzunni, Eva systir mín vildi alltaf hafa sína pizzu svoleiðis þegar hún var lítil. Þá eru brauðstangirnar bornar fram með pizzusósu til að dýfa í.

Innihald:

• 6 tsk þurrger
• 6 1/4 dl volgt vatn
• 14 - 16 dl hveiti (nota oftast heilhveiti í helminginn eða jafnvel nota spelt í staðinn)
• 2 tsk salt
• 2 msk hunang

Aðferð:

1. setur vatnið í skál, en vatnið á að vera við líkamshita.
2. nærð þér í venjulega tsk og fyllir hana rúmlega af hunangi og hrærir við vatnið.
3. setur þurrgerið útí og hrærir eins lítið og þú getur en nóg til að það blotni allt. Svo bíðurðu bara þangað til gerið er búið að blása svo mikið út að þú sérð ekki lengur vel í vatnið.
4. þá skellirðu saltinu yfir og byrjar að hella hveiti útí. Hrærir og hnoðar þangað til deigið er orðið ágætlega mótað en ennþá blautt.
5. Setur rakt viskustykki yfir og leyfir deiginu að lyfta sér í a.m.k. 30 mín.
6. Deigið hnoðað upp úr meira hveiti og flattir út mjög þunnir botnar.
7. Ég flet út hring og skelli því á pizzugrind (fást á 1000 kr í IKEA) og sker það sem fer útfyrir grindina af með pizzuhníf og fæ þá svona ljómandi fallegar pizzur.
8. Gott álegg sett á og pizzurnar settar í 180°C heitan ofn í 3-5 mín, eða þangað til osturinn er bráðnaður og byrjaður að "bubbla".

Álegg:

Ég er með mjög sterkar skoðanir á hvað er best að nota ofan á pizzur.

Besta pizzusósan er að mínu mati Contadina, pizza squeeze (ég kaupi hana í bónus). 

Ég nota bara rifinn mozzarella ost því það er enginn annar ostur jafn góður á pizzu og það er náttúrulega lykilatriði að setja vel af oregano á hverja pizzu.

Þykkar, góðar og matarmiklar vöfflur

Þetta er uppáhalds vöfflu uppskriftin mín, vöfflurnar eru ljúffengar og uppskriftin er sykurlaus svo ég get með góðri samvisku boðið fólki með sykursýki upp á þær (þekki furðu marga með sykursýki) og þeim sem kjósa sykurlausan lífsstíl.

Innilhald:

• 3,5 dl heilhveiti
• 4 dl hveiti
• 3/4 tsk salt
• 2 3/4 tsk matarsódi
• 1 L súrmjólk
• 135 ml matarolía
• 3 egg
• rúmlega 2 tsk sítrónudropar

Aðferð:

• Þurrefnum blandað saman.
• Súrmjólk, olíu og eggi hrært við.
• Ekki þarf að smyrja vöfflujárnið áður því olían í deiginu passar upp á að deigið festist ekki við.

Ef að þú átt ekki tvöfalt vöfflujárn og býrð oft til vöfflur þá mæli ég eindregið með því að þú fjárfestir í einu slíku því það tekur náttúrulega tvöfallt styttri tíma að búa til vöfflurnar.. og biðin eftir að mega byrja borða þær er oft svo erfið og löng. Sérstaklega fyrir litla fólkið!

Meðlæti:

Fólk er nú venjulega alveg með það á hreinu hvað það vill hafa á vöfflunum sínum en vildi samt koma með nokkrar öðruvísi uppástungur fyrir þá sem fá sér alltaf það sama og langar að prófa eitthvað nýtt.

• Flórsykur. Þýskt afbrigði sem kemur skemmtilega á óvart
• sýróp og banana - best á amerískar pönnukökur en líka sjúklega gott á vöfflu.
• brætt súkkulaði, þeyttan rjóma og banana (sjúklega gott)
• Ef þú ert að fá einhvern í vöfflur sem borðar ekki sykur þá er gott að kaupa sykurlausu sultuna (man ekki hvað hún heitir en hún fæst í heilsuhorninu í flest öllum búðum) og vera með þeyttan rjóma. Það er oft viðbættur sykur í sprauturjómunum sem maður kaupir.

Besta banana og döðlubrauð í heimi

Þetta er uppáhaldsbrauðið mitt og er ég mikill brauð aðdáandi. Það er svo notalegt þegar brauðilmurinn fyllir heimilið og ég tala nú ekki um hvernig volgt brauðið bráðnar í munninum á manni. Það er best að borða brauðið samdægurs og langbest að borða það þegar það er nýkomið úr ofninum!

Innihald:

• 3 dl volgt vatn
• 1 tsk salt
• 1 banani (vel þroskaður)
• 1 dl smátt saxaðar döðlur
• 5 dl heilhveiti
• 5 dl hveiti
• 1 msk þurrger

Aðferð:

Brauðvél:
Ef þú átt brauðvél þá er náttúrulega algjör snilld að skella þessu bara í hana á klassísku stillinguna og pæla ekki meira í því fyrr en það er tilbúið. En mér finnst skemmtilegra að borða þetta í brauðbollum þannig að ég stilli vélina á "dough" (deig). Ef þú notar brauðvélina þína ekki oft þá er það eina sem þú þarft í raun og veru að pæla í er að setja vatnið fyrst og gerið seinast.

Deig búið til í höndunum:

1. Stappaðu bananann, blandaðu honum við vatnið og þurrgerið. 
2. Blandaðu döðlunum og þurrefnunum við. 
3. Settu hveiti á borðið og hnoðaðu deigið vel. 
4. Settu rakt viskustykki yfir og leyfðu að lyfta sér í 30 mín - 1 klst.
5. Ef þú vilt búa til heilt brauð þá seturðu hefurðu það í ofninum í ca. 45 mín við 180°C en ef þú vilt bollur þá fylgirðu leiðbeiningunum hér að neðan.

Bollur:

1. Nærð þér í ofnplötu og skellir á hana smjörpappír 
2. Býrð til bollur úr deiginu. Hver bolla er á sært við 1 1/2 golfbolta. 
3. Setur viskustykki yfir bollurnar og leyfi þeim að lyfta sér í ca 30 mín. 
4. Penslar bollurnar með eggi (eða mjólk).
5. hitar ofninn á 180 °C og bakar svo bollurnar í ca. 10 mín, eða þangað til þær eru fallega brúnaðar og þegar þú lyftir bollunni upp þá er hún aðeins brún undir.

Meðlæti:

Nammi gott að fá sér heita bollu með smjöri, osti og marmelaði. En þær eru líka ljómandi góðar eintómar og kaldar. 

Karrý Kjúklingur Únu

Ég er alltaf svolítið veik fyrir karrýréttum, tala nú ekki um ef það er einhver kókos factor líka. Þessi stendur alltaf fyrir sínu og er mildur og góður. Það er ekki auðvelt að gleðja alla í fjölskyldunni minni með kvöldmatnum, betri helmingurinn minn er matvandur með meiru, unglingurinn líka, 4 ára skottan hefur óbeit á kryddi en 2 ára dúllan vill hafa MIKIÐ bragð og gæti örugglega borðað eintóman chili pipar ef það væri í boði. En þessi réttur er einn af fáum sem rennur ljúflega niður hjá öllum. Rétturinn er fyrir 4 en ég geri venjulega tvöfalda uppskrift og við borðum hann með meðlætinu hér að neðan daginn sem hann er eldaður. Afgangnum af karrýinu er blandað við hrísgrjónin og skellt inn í ískáp. Daginn eftir hita ég grítuna upp og rista brauð. Brauðið er skorið í 2 þríhyrninga, smurt með mango chutney og grítunni skellt ofan á. Einfalt og svo gott og manni finnst manni finnst maður alls ekki vera borða afganga þegar búið er að pimpa þetta aðeins upp.

Innihald:

• 1 heill kjúklingur
• 3 hvítlauksrif
• 1 tsk sjávarsalt
• 1 1/2 pinch af engifer
• 2 pinch svartur pipar
• 1-2 tsk karry
• 2 epli
• 10-12 litlir gulir laukar
• 2 msk kókos
• 2 dl súrmjólk
• 2 dl af vatni með kjúklingakraft
• 1 paprika
• 1/4 pinch af chili dufti
• 1 pinch af chili dufti

Aðferð:

1. Hvítlaukurinn skorinn og kryddaður með salti, pipar og engifer.
2. Kjúklingur skorinn í 8 - 10 bita.
3. Kryddblöndunni er nuddað í kjúklinginn.
4. Eplin eru skorinn í teninga.
5. Kjúklingurinn er brúnaður, eplunum og karrýinu er bætt útí.
6. Súrmjólkinni bætt útí og grítan látin ná suðu á meðan hrært er í.
7. Kókosnum, kraftsoðinu og lauknum bætt við. Látið malla við vægan hita í 20 mín. með lokið á pottinum.
8. Paprikan skorin í strimla og bætt út í ásamt chilli kryddinu og þetta látið malla áfram í 5 mín.
9. Kókos og salthnetum stráð yfir og voilá! Verði ykkur að góðu.

Meðlæti:
Karrýið er borið fram með hrísgrjónum, mango chutney og jafnvel salthnetum í skál.. og það má náttúrulega ekki gleyma salatinu.

Ítölsk grænmetissúpa

Þessi súpa er ótrúlega matarmikil og góð og vekur alltaf mikla lukku hjá öllum á heimilinu. Grænmetisvalið er bara tillaga, ég set venjulega bara það grænmeti sem til er í súpuna en mér finnst samt nauðsynlegt að hafa kartöflurnar og gulræturnar. Þegar ég bý til þessa súpu þá geri ég jafnan tvö- til þrefalda uppskrift og frysti afganginn. Það er svo gott að eiga hollan og góðan mat tilbúinn í frystinum.  Þegar ég ætla að frysta þá bæti ég samt pastafiðrildunum ekki útí, heldur sýð pastað í sér potti og set í hvern disk, því pasta er að mínu mati ekki gott þegar búið er að frysta það. Súpan geymist líka í 4-5 daga í ískap og eins og flestar súpur þá er hún enn betri þegar maður hitar hana aftur upp.

Innihald:

• 1 laukur
• 2 gulrætur
• 1 sellerístilkur
• 5-6 kartöflur
• 1/2 blómkál
• 4 hvítlauksrif
• 1/2 L vatn
• 3 grænmetisteningar
• 400 g saxaðir tómatar í dós
• 3 msk tómatpúrra
• 1 tsk oregano
• pipar
• 2 dl pastafiðrildi

Aðferð:

1. Grænmetið er skorið niður í hæfilega munnbita.
2. Steiktu grænmetið þangað til laukurinn er orðinn mjúkur og gegnsær.
3. Bættu tómötum, tómatpúrru, vatni og grænmetisteningum við og láttu sjóða við vægan hita í ca. 30 mín. 
4. Pastafiðrildunum skellt í og látið sjóða í 10 mín í viðbót (eða samkvæmt leiðbeiningum á umbúðunum).
5. Kryddaðu súpuna
6. Njótið vel

Meðlæti:

Mér finnst nauðsynlegt að hafa gott brauð með. Helst nýbakað og brakandi.

Gómsætur Piri Piri Kjúklingur með bankabyggi, jógúrtsósu og salati

Kjúklingur og marinering:

3-4 kjúklingabringur eða bakki af kjúklingalundum
½ dós grísk jógúrt
2 tsk. Piri Piri krydd
1 tsk. kjúklingakrydd
1 tsk sjávarsalt
smá skvetta af soya sósu
2 tsk olía
1 tsk sítrónusafi

Hræðu saman jógúrtina með kryddunum, olíunni og sítrónusafanum í skál. Skerðu kjúklingabringurnar í sneiðar settu út í skálina með marineringunni. Hrærðu saman og leyfðu því að marinerast í 1-2 klst. Steiktu svo kjúklinginn á pönnu eða skelltu honum á grillið, það er náttúrulega langbest :)

Bankabygg:

3 dl bankabygg

9 dl vatn

1-2 tsk sjávarsalt

1 tsk karrý

Allt sett saman í pott og látið sjóða í 40 mín. 

Jógúrtsósa:

3 msk af grískri jógúrt

1/2 dl kalt vatn

salt

pipar

chilli krydd

skvetta af sítrónusafa

fersk steinselja (hef líka notað þurrkaða ef ég hef ekki átt ferska til)

Steinseljan er skorin smátt og svo er öllu blandað saman.

Ég hef líka keypt jógúrtsósuna frá Saffran og haft hana með réttinum.

Salat:

1/2 gúrka

3 tómatar

1/2 poki blandað salat

Sítrónusafi

Fræhreinsaðu tómatana og skerðu grænmetið mjög smátt og settu svo smá skvettu af sítrónusafa yfir.

Meðlæti:

Piri Piri sósa frá Saffran
Grillaður rauðlaukur
Grilluð epli

Þetta er svolítill dútl matur en rosalega góður og hollur. Verði ykkur að góðu :)

Spínat Lasagna

Innihald: 
1 pk lasagnaplötur

fylling: 
1-2 msk lífræn kókosfita 
2-3 laukar, smátt saxaðir 
2 pokar ferskt spínat 
½ tsk múskat 
1,5 tsk karrý 
1 tsk salt 
1 - 2 dósir kókosmjólk 
200 -300g rifinn geitaostur/ mozzarella ostur
200 - 300g soðnar kartöflur eða hýðishrísgrjón

Aðferð:

1. Laukurinn er mýktur í smá lífrænni kókosfitu í 2-3 mín 
2. spínatinu bætt útí smátt og smátt
3. kryddinu og kókosmjólkinni bætt í og og þetta er látið malla í ca 10 mín. 
4. Þessu er skellt í skál og osturinn og kartöflurnar/hrísgrjónin sett útí. 
5. Síðan er lasagnaplöturnar og fyllingin settar til skiptis í ofnfast mót og ostur settur ofan á fyllinguna í lokin.

- Það er hægt að strá smá aukaosti yfir fyllinguna áður en lasagnaplöturnar eru settar ofan á fyllinguna. Eins er hægt að hella smá auka kókosmjólk hringinn í kringum formið innanvert ef fyllingin er of þurr. 

- Þetta bakast svo við 200°C í  25-30 mín. Hafðu lok eða álpappír yfir mótinu til að byrja með en taktu það af þegar ca. 5 mín. eru eftir. 

Látið standa í 5 mín. skerið svo í bita og setjið rautt pestó ofan á. Ef þú ert í stuði þá geturðu búið til þitt eigið pestó en ég skellti bara filippo berio pestói ofan á.

Meðlæti:

Berið fram með nýbökuðu grófu brauði og stóru og miklu salati

Það er fljótlegt og auðvelt að matreiða þetta og þrælgóð leið til að fá börnin til að borða vel af spínati! Verði ykkur að góðu :)

Afríkönsk grænmetiskássa

Innihald:

2 grænar paprikur
1 laukur
250 g sveppir (einn bakki)
1 zuccini
1/2 bolli af olíu
2 bollar vatn
lítil dolla af Hunts tomate paste
kúfuð matskeið af hnetusmjöri með hnetum
1 tsk salt
1 tsk chili

Aðferð:

1.  Þú mýkir grænmetið í olíunni.
2. Bætir við vatninu og tomate paste og soðið í 20 mín.
3. Hnetusmjörinu, saltinu og chili-inu bætt við og smakkað til.

Gott meðlæti:

Mér finnst nauðsynlegt að hafa nan brauð og hrísgrjón með og svo er breytilegt hvað annað ég hef með. Það er gott að hafa:
Mango chutney
Salat
Kókos
Banana
Rúsínur

Þetta er hollur, góður og ódýr réttur sem auðvelt er að búa til og breyta eftir því hvað er til í eldhúsinu að hverju sinni. Stundum steiki ég kjúkling og bæti honum útí kássuna, mér finnst það ekkert nauðsynlegt en maðurinn minn er alltaf glaðari ef það er kjöt í matnum :)

Gómsæt oreo skyrkaka

Innihald:

1 peli rjómi
ein vaniluskyr 
2 pakkar af oreo kökum
1 msk flórsykur
1 tsk vaniludropar ( eða vanilusykur, vanilustöng) 
100 gr. smjör.
Súkkulaði plata

Aðferð: 
1. Tekur smjörið útúr ískápnum og leyfir því að ná stofuhita.
2. Botninn býrðu til með að blanda saman einum muldum pakka af orea og linu smjörinu og þrýsta deiginu í formið.
2 Þeytir rjómann, setur skyrið, flórsykurinn og vaniludropana og nokkarmuldar oreo kökur út í og hrærir létt í viðbót.
3. Setur þetta síðan ofan á oreoið í forminu og skreytir með ca. 3-4 oreo kökum. 
4. Síðan bræðiru súkkulaði og skreytir með því yfir?

Díana vinkona mín úr 2010 mömmuhópnum mín kom með þessa köku í saumaklúbb hjá okkur. Ég bara gat ekki hætt að hugsa um hana og varð að fá uppskriftina. Þessi kaka er einföld í gerð,  það tekur ca. 10 mín að búa hana til og hún er gómsæt! Verði ykkur að góðu